من تحت لي تحت

لو تعرف الخطايا كيف كنت محروم
كان سود الليالي يوم طحت سمحت
ولو هموم المقارق مثل كل الهموم
ما تشوفون عيني بالدموع سبحت
ولو تحن المشاكل عقب حب الخشوم
كان حبيت خشم المشكله واستحت
بين صدة عزيز وكبرياء مهزوم
عين شحت علي وعيناً استسحمت
بس ما الله خلقني من بكاي معصوم
وادري ان المحاجر لو تفيض فضحت
والله اني على جرحي صبور وكتوم
بس الدموع لي روحت .. روحت
اعذلتني ظروفي وانهكتني عزوم
والوجيه حزنت لي والقلوب فرحت
والله ان الليالي ما تعرف السلوم
قلب جافي لقاه ووجه صافي باحت
راهنتني تبلل بالدموع الكموم
ويشهد الله عليها راهنت وربحت
احرمت نور عيني من غلا ريم قوم
بذرة وارتوتني واثمرت وطرحت
جادلاً دوم ما هي بمثلها كل يوم
استضاحت غموض وبالغموض وضحت
دورت بين قلبي والهدب درب نوم
وامرحت وين مدري المهم امرحت
تنحت اسمي بقلبا جيت فيه معزوم
واسمها بين جلدي والعظام انحت
مثل جفني لعيني للنعاس محكوم
كل ما نمت نامت .. كل ما اصحى صحت
ما تعارض كلام غير عند اللزوم
بس لا قمت اسولف واندمج سرحت
دايم ازعل عليها بس قلبي رحوم
وهي تموت في عذابي من تحت لي تحت
مثل وجه الصداقه في ثياب الخصوم
ان تطيبت طابت ان جرحت .. اجرحت
خصها الله بوصف من خيال معدوم
لا آذان سمعت به ولا عيون لمحت
كن ربي خلقها من بياض الغيوم
ومن كفوف السحابه بالورود لقحت
عن سواها فرقها بالقمر والنجوم
وكل عذرى تباها بالجمال نزحت
بالحلى هي كوم وباقي الناس كوم
كفة عادلوها بالبشر ورجحت
حسبي الله على اللي ما بغاها تدوم
من بعد كيف كانت شوف كيف اصبحت
لا تحقق وصال ولا فراق محتوم
خطةً قربتني للفشل ونجحت
لعنة العشق تبقى مثل ضرب السهوم
لو محى الوقت جرحه طعنته ما امحت
كيف ابنسى وانا اللي من جفاف لسموم
ما حشمت العيون ولا الدموع فلحت
كانها بالحميا كل ربعي قروم
لو يلدون لصعاب الظروف صلحت
اجزم ان كنت يا قلبي شجاع وجزوم
لد لعيون بنتاً لا التفت لفحت
من تهين البخيل الا يدين الخدوم
دام كف الخطايا بالجفى لوحت
نطح الباس باس ونطح اللوم لوم
ان تهدت تهد وصيح ان صيحت
يا تعيش بمعزه يا تموت محشوم
ودك ان الليالي لا فعلت مدحت
عمر ضعف الاراده ما يسر الرخوم
ضربة السيف لو بأيد الشجاع ذبحت